زنگین یول زنگین یول | چاغداش شعر و ادبیات سایتی
اؤزگه
گئدیرم باش دومانلی، سئودالی
بو اویون دونیایا گولوب گئدیرم
داش دؤین، بو قابار آیاقلاریلا
آلنیمین قان-تَرین سیلیب گئدیرم
یئریییب اوج- بوجاق قیراقلاردا
قال- ماغالدان ایراق، اوزاق، گزیرم
“سارتر”ین سَرت اوره‌ک بولانماسی‌یام
“نیچه”نین هَپ قارانلیغینا اوزورم
گون به گون پیسله‌شیر گؤزومده یاشام
بشری مین بویالی گؤردوکجه
آز قالیر، آز قالیر بی دیبلی چاشام
دۆشلریمده ایلانلار هوردوکجه
کؤلگه‌م حتتا من ایله دوغرو دئییل
روحوما دم به دم میشار چکیلیر
ایپ ساپی آیریلیر، بیری “منده”
ذرره- ذرره، پَرَن- پَرَن تؤکولور
گئدیرم باش آلیب اوزاقلاردا
بلکه بیر یوللوق آیریلام “من” دن
کابوسومدا گؤروردوم هن آخشام
بیر “سحر” بویلانیر منی گئندن!!
*سارترین اوره‌ک بونلانماسی، تهوع کیتابینا ایشاره‌دی
