شعر | کیان خیاو

کیان خیاو

هله یارام واردیر

ساغالماييب يارام ای گول ، هله يارام واردير .
سينه‌مده، سندن ايراق، خال‌باخال قارام واردير .

هله قوياق‌کی آچيلدی بو باغلی قاپ-باجالار
هارا گئديم من آخی ، گئتمه‌يه هارام واردير ؟!

من اؤز ايتيرديیيمی گؤز ياشيمدا آختاريرام
گؤزوم ياشيندا بير ايتگين دوشن سارام واردير .

چتيندی قيوراق اولام بيرده داشلی يوللاردا
کی ميخچالی آياغيم ، ميخلی قوندارام واردير .

گلين کيمی بزه‌نَن داغلارين باتيب قولاغی
هله دئييرکی گونش‌دن‌ده گوشوارام واردير .

قارا قفسلره اؤيره‌نميشم قيزيل قوش تک
قانادلاريمدا گؤر اوخلانماميش هارام واردير !؟

گئجه گؤزو بو قارا شر-شبئه کاريمدا دئييل
منه یئتر کی سنين تک بير آی‌پارام واردير .

اؤلومجولمسه‌ده اؤلمکله پنجه–پنجه‌ده‌يم
سنی ياشاتماغا البت‌کی بير چارام واردير .

غزل–غزل اوره‌ييمده سيزيلدايير بير عشق
ساغالماييب يارام ائی گول ، هله يارام واردير.

 

آراشدیرا بیلر سیز

بهزاد بیات فرد

شعر | بهزاد بیات فرد

• یاشام دویانمادیم یاشامین سارسیلان داریخماسینی تیکنمه‌دیم اؤزومه کیپریک آلتی باخماسینی دی‌کیم‌دئییب‌دی‌کی‌باخت اولدوزوم‌گؤی‌ایچره‌باتیب گودوکچویم کی …

دیدگاهتان را بنویسید

نشانی ایمیل شما منتشر نخواهد شد.